رحلة نجاح / زهراء صادق / كلية التقنية الطبية

زهراء صادق فالح

كلية الكوت الجامعة _تقنية طبية تحليلات مرضية

عنوان القصة (لن يهزم شخص يؤمن بنفسه

اكثر جملة ترددت ع لساني هي (وافوض امري الى الله)

كل شخص عنده طموح ويكون شغوف بمجال يحب يدرسه،كان طموحي المجال الطبي وكنت كل مااشوف شي متعلق بمرض او دم او دواء احس هالشي متعلق بيه اكثر مادة كنت احبها هي الاحياء والانكليزي واكثر ماده صعبه بالنسبة الي الرياضيات الدرس الوحيد الي نزل معدلي لان ماكنت احبه .. بين تعب وسهر وقلق ودراسة نجحت من السادس ورب العالمين مكتبلي المجموعه الطبية فانقبلت هندسة ميكانيك بالجامعة التكنولوجية /بغداد المحافظة الي كنت رايدتها .

حاولت اقنع نفسي بكل طريقة بالهندسه لكن بدون فائده..

ردت ادرس بجامعة وبتخصص وافتخر بي

لكن بيوم من ايام التقديم فكرت بنفسي وشنو الاريده وخيرت نفسي بين اختيارين اما الجامعة التكنولوجية المعروفه والكبيرة واما المستقبل واختاريت المستقبل..

قدمت تحليلات مرضية بمدينتي والكل استغربوا لان عفت التكنو وقدمت تحليلات (لان معدلات التحليلات منخفضة وماكو تعيين ) لكن مدام اني احب هذا الشي راح انجح بي  والحمدلله والشكر مرتاحة بدراستي وفرحانه بالاختصاص الي هو حلمي والي مينتهي برني قبعة التخرج ان شاء الله ..

لكل الي يدرسون سادس

;الي الله كاتبه يصير والخيره فيما اختاره الله ..

خليك واثق برب العالمين لان ميخيب ضنك واتذكر الله ميضيع تعب احد راح تشوف تعبك كدامك ع هيئة فرح راح تنسه كل التعب والسهر والحيره الي انت بيهه بس اثق برب العالمين .ومن تدخل للامتحان اتذكر الله تعالى يكول ياعبدي اسعي واني اعينك وانت درست وتعبت وبقت مساعدة رب العالمين الك ،،ومهما كان وصار السادس مو قياس احلامك وامنياتك وطموحك السادس ميوقفها انت بجدك وباصرارك وبثقتك تكدر تسوي التريده ..لتهتم لاحد لان يموت نص ابداعك واصرارك اذا فكرت براي الاخرين لتخلي شخص يهدم احلامك ابقى مصر تكمل وتنجح وتوصل للتريده الحياة مالها طعم بدون هدف!!; قد تتعثر ويطول الطريق لكن راح توصل...(وكيف يموت حلما البسناه حلل اليقين💫☘)

اعداد 

برنامج رحلتي في السادس

حملة شبابنا