رحلة نجاح / معن قيس / قصة اصغر ضابط في العراق

معن قيس

الكلية العسكرية 

 من اني وصغير احب الشغلات الي تختلف وتميزني عن باقي الناس..وجنت دائما الناس تعرفني لاني من مواليد ١٩٩٧ واكظيت عمري ادرس وية ال٩٦
 يعني كاسب سنة..حلمي واني صغير انو اصير ظابط مثل ابوية الله يرحمة ..جانت العالم دائما تكولي لا انت مستواك مال هندسة وما اعرف شنو محد وافقني بحلمي..غير اخوية الاكبر مني لان هو هم ظابط وتقريبا مثل تفكيري' زاد تعلقي بهالمهنة بعد استشهاد ابوية الله يرحمة سنة ٢٠٠٦ اثناء الواجب..صرت اتمنى الكلية العسكرية اكثر من اي شي بحياتي
 جنت دائما اسمع انو هي مصنع الرجال وجنت ما اريد اخلي نفسي بأي شي غير (الكلية العسكرية الاولى)..مرت فترة واني اسولف بيهة وين ما اروح وكلها تكول الي يابة انت ليش تورط نفسك بهيج شي..جنت معتبر كلامهم كلام غير منطقي وابد مو قريب مني..دخلت السادس وجنت اريد انجح بس لان الكلية العسكرية مرحلة بعد نجاح السادس..طول فترة السادس جنت كل ما اطلع من بيتنا اشوف الاعلان مال شركة كورك للاتصالات مكتوب بيه(تجرأ ان تحلم)
 هاي الجملة جانت مسوية عندي حافز كلش جبير بداخلي..خلصت السادس وبدون ما اقدم كلية مدنية اخذت وثيقتي وقدمت ع الكلية العسكرية..بالبداية رفضوا لان عمري ١٧ سنة وهم رايدين عمر ال١٨ وفوك..رجعوني وكالولي قدم السنة اللخ من تبلغ وتصير بعمر ال١٨..رجعت للبيت ورجعت لشغلي الي جنت اشتغل بيه كل عطلة..واني بالشغل وصلتني رسالة من رقم غريب(معن قيس..تم قبول مواليدك بالكلية العسكرية الاولى راجع الكلية ).
قدمت وكملت وانقبلت بيها والحمدلله''سنتين من التعب 
 والتدريب الي ما تكدر تعبر عنه بالكلام..وبالرغم من صغر سني كدرت اتعايش وية كل هالتدريبات..والحمدلله اتخرجت واتسجلت كأصغر ظابط بالجيش العراقي.
نصيحة:
 لا تخلي اي احد يأثر عليك اذا جنت مخلي شغلة ببالك..لان الي يسمع كلام الناس بحياتة مراح يسوي شي
اتوكل ع الله وسوي الي ببالك وبس 
 (تجرأ ان تحلم)

اعداد 

برنامج رحلتي في السادس

حملة شبابنا