رحلة نجاح / محمد خليل / معاناة نازح تغلب على الالم وحقق النجاح

محمد خليل ابراهيم
من محافظة الانبار / معدل  95

اني من الرمادي دخلت السادس علمي سنة 2014 ودرسنة شهرين بمدرستنة وجان تسقط مدينة الرمادي ونزحت لبغداد وماكملت السادس لأن واهس ماكو بالدراسة بسبب وضعي فتركت السنة بعدها سجلت بالسنة الثانية 2015 بأحد مدارس الغزالية طبعاً اني بالبداية أبد مالي واهس بالدراسة وتحظير ما احظر ورسبت بالشهريات بالفصل الأول وجنت مفكر أعيد السنة لأن مستحيل اطلع معدل ب 90 بهيج وضع وما داخل ولادرس خصوصي والطلاب بشعبتي أغلبهم داخلين خصوصي بس كلت اني لازم اغير من وضعي واتحدى المستحيل واستخدم كل قدراتي وامكانيتي في الدراسة والحصول على أفضل النتائج لأن اني تعبان تعبان خل ادرس زين وفعلاً بديت بعد نصف السنة واشتريت ملازم زينة وبديت اقرة يوميا وحدي بشكل منتظم وأهم شيء ابتعدت عن كل شيء يلهي عن الدراسة وأولها الكارثة الموبايل والنت وبدت تظهر النتائج سريعة وصرت أجيب درجات ب 90 بالشهري وجان اعطل للمراجعة وخليت طموح أجيب معدل ب 90 بس بعدين مارضيت بيها كلت أن شاء الله أقل شي أجيب معدل ب 95 حتى ادخل مجموعة طبية وضليت ادعي يومية يارب ارزقني معدل فوك 95 والحمد لله استجاب الله دعائي وجتي نفسها 95❤️ وجنت ساكن بيت هيكل غرفة وحدة ماكو مكان فاصعد على السطح اقرة وحدي بس اكلني الذبان بوكتها بس اتحملت 😞😥وأثناء الدراسة اجتني صورة بيتنة متهدم بالرمادي وكلش انقهرت😢😭 وصار عندي تحدي أكثر ادرس واجيب معدل  عالي وافرح أهلي بهاي الضروف الصعبة والحمد لله رب العالمين توفقت وأخذت هذا المعدل العالي (وطلعت الثاني على المدرسة واني نازح يمهم ) واكتشفت انه ماكو شيء صعب ومستحيل فقط يجيب اتباع الطريقة الصحيحة في الدراسة.

#سلسلة_رحلة_نجاح

اعداد 

برنامج رحلتي في السادس

حملة شبابنا